ಗಾಳಿಯೂ ಸರಕಿಲ್ಲಿ

ಪಿ ಆರ್ ವೆಂಕಟೇಶ್

ಗಾಳಿಯೂ ಸರಕಿಲ್ಲಿ

〰〰〰〰〰〰〰

ಭ್ರಮೆಯ ಉನ್ಮಾದ

ತುಟ್ಟತುದಿಗೇರಿದ ಭಾವವೇ ದೇವರಿಲ್ಲಿ

ನಿಗೂಢ ಗರ್ಭ ಗುಡಿಯೊಳಗೆ

ಅರಿವೆ ಇಲ್ಲದ  ಪೂಜಾರಿ ಬೆತ್ತಲು

ಮಂತ್ರ ಸಲಹೆಯ ವೇದಘೋಷ

ಎಲ್ಲದರ ಮುಂದೆ 

ಮಂಡೆಯೂರಿದ ನಂಬುಗೆಯ  ಜನ 

ಗೊಂಬೆ ಮುಂದಿನ ಗೊಂಬೆ.

ಅನೀತಿ ಕುತಂತ್ರಗಳೇ ರಾಜಧರ್ಮ

ಹಸಿದ ಕರುಳಿನ ಕೊರಳಿಗೆ

ಹಣತೆಯ ಎಣ್ಣೆ ಜಿಡ್ಡಿಗೆ ಮೂಗರಳಿಸಿ

ಕಾಲೆತ್ತುವ ನಾಯಿ

ಎಂಜಲೆಲೆ ಪ್ರಜೆಗೆ

ಹಳಸಿನ ಪಾಲಾದ ಪ್ರಜಾರಾಜ್ಯ.

ಉಸಿರು ತೇಕುತ್ತಿದೆ ಒಡಲು

ಬೆಲೆ ಬಂಧಕೆ ಸಿಲುಕಿದ ಗಾಳಿಗೆ

ಸಾವು ಕುದುರೆ ಏರಿದಾಗಲೇ

ಉಸಿರು ತುಂಬುವ ಗಾಳಿ ಸರಕು

ಪ್ರಾಣಯಾತ್ರೆ ಅಬ್ಬರಕೆ ಹೆಣದ ಸುನಾಮಿ

ಸಾವಿನ ತತ್ತರಕ್ಕೆ ಹೀಚಿದ ಮಸಣಗಳು 

ಏನಿಲ್ಲ  ಇಲ್ಲಿ ನನ್ನ ನಾಡಲ್ಲಿ

ಪ್ರಾಣಗಳ ಪಣಕಿಟ್ಟ ಮುಗಿಲೆತ್ತರ ಗೋಪುರ

ಕೋಟಿ ಕೋಟಿ ಕಾಣಿಕೆಯ ಪ್ರತಿಮೆಯ ಅಂತಃಪುರ

ತಂತ್ರಾಲೋಚನೆಯ ಆಲಯಕ್ಕ

ಕೊಟಿ ಬೆಲೆಯ ಪಾರ್ಲಿಮೆಂಟು

ದೊರೆಯೇ

ದಿಕ್ಕೆಟ್ಟ ಜೀವದುಸಿರು ಸಾವಿಗೆ ಶರಣು

ಪ್ರಾಣ ಗಾಳಿಗೂ ದರ ನಿಗದಿ.

ಇಲ್ಲಿ ಜಗಮಗಿಸುವ ನನ್ನ ನಾಡಿನಲ್ಲಿ

ಉಸಿರೂ  ಗಾಳಿಯೂ 

ಮಾರುಕಟ್ಟೆಯ ಸರಕು.

ಪಿಆರ್. ವೆಂಕಟೇಶ್.